სამოქალაქო განათლებისა და პედაგოგთა გადამზადების პროგრამის ბენეფიციარი შეზღუდული შესაძლებლობის მქონე ახალგაზრდების უფლებებს იცავს

2012 წლის 26 დეკემბერს საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე შეზღუდული შესაძლებლობის მქონე პირთა უფლებების უზრუნველყოფისათვის საჭირო საკანონმდებლო საკითხებზე იმსჯელეს. განხილვაში მონაწილეობას იღებდა სულხან ჩარგეიშვილი, თბილისის ი. ვეკუას სახელობის ფიზიკა-მათემატიკის # 42 საჯარო სკოლის კურსდამთავრებული, რომელმაც როგორც სასკოლო სამოქალაქო კლუბის ლიდერმა 2011 წელს მონაწილეობა მიიღო სამოქალაქო განათლებისა და პედაგოგთა გადამზადების პროგრამის ფარგლებში განხორციელებულ პროექტში „ხელი-ხელს“. პროექტი შეზღუდული შესაძლებლობის მქონე მოსწავლეების უფლებების ადვოკატირებასა და ამ უფლებების დარღვევის შესახებ შესაბამისი სტრუქტურების ინფორმირებას ითვალისწინებდა. სულხანი ამბობს, რომ აღნიშნულ პროექტში მონაწილეობამ მას მისცა საშუალება, მეტი გაეგო შეზღუდული შესაძლებლობების მქონე ახალგაზრდების პრობლემების შესახებ და საკუთარ თანატოლებთან ერთად დაეწყო ფიქრი იმის შესახებ, თუ რა უნდა გაკეთდეს ახალგაზრდების ძალისხმევით აღნიშნული პრობლემების მოსაგვარებლად. მოსწავლეთა პროექტი „ხელი-ხელს“ დაფინანსდა სამოქალაქო განათლებისა და პედაგოგთა გადამზადების პროგრამის ფარგლებში,რომელსაც ახორციელებს ამერიკული ორგანიზაცია PH International ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით.